２０１１年二二八事件六十四週年記念禮拜祈禱文

２０１１年二二八事件六十四週年記念禮拜祈禱文

２月２７日暗時7點30分佇台南太平境馬雅各紀念教會

　　為著阮世間人的罪，互人釘佇十字架頂，受人侮辱，受難受苦的主耶穌，阮此的時陣同心相及聚集佇遮，是為著要紀念佇六十四年前，就是一九四七年佇阮台灣所發生的二二八事件。

　　佇事件的過程中，有無數的台灣人受到當時國民黨執政當局的殺害、壓迫；有的喪失寶貴的生命，有的佇黑牢中受苦受關到死，有的家庭破碎，也有多多受難的家屬到今心神猶啲受折磨。

　　因為雖然政府當局有重新啟用國家二二八紀念館，總是阮看見佇記念館所呈現出來的，原來是刣死台灣人精英染甲歸雙手全全血的的大兇手蔣介石，煞被美化成做敉平叛亂的大英雄！？主啊，阮的心真疼，因為對安呢看見國民黨政府一點啊攏無悔改檢討反省，呣知將阮台灣人看做是什麼？！

　　主啊，祢知佇阮台灣人的心中所期待的是完全無掩蓋來公佈二二八事件對頭到尾的真相，因為有真相才有公義，有公義才有公平及和平。安呢，彼些犧牲，受傷受難的家屬才會通得著安慰。

　　阮也祈求互此的事件成做學生囝仔的教材，來教育下一代，互in能曉學習互相尊重，佇此塊土地的頂面大家真實和好相疼。

　　疼阮台灣人的主，阮的上帝，阮佇此的時，同心懇求祢的聖神叫醒阮台灣人，也憐憫看顧阮，因為阮雖然曾有多多人為著台灣的土地及台灣的民主、獨立來努力打拼甚至犧牲生命，總是猶原有真多台灣的同胞復帶有政治的冷感症，無關心祢所賞賜阮此塊美麗島嶼的命運及前途，只有自私顧自己，顧賺錢、又復驚死！互阮感覺真見羞！

　　主啊！求祢憐憫阮對鄉土的關心無夠額，赦免阮對追求真相公義無盡心盡力打拼的罪，也求祢的聖神安慰到今猶著受折磨的受難家屬的心靈，賦in能堅強起來，將憂傷悲愁化成氣力，共同為台灣的民主及台灣的獨立建國來努力打拼。

　　阮按呢祈禱，攏是靠主的名來求，阿們！

　～新樓醫院院牧部主任 許天賢 牧師～